السيره النبويه الجزء الثالث

بسم الله الرحمن الرحيم

[center]الحمد لله والصلاة والسلام على رسول الله
اما بعد
نكمل كلامنا عن جوانب من عظمة شخصية سيدنا محمد صلى الله عليه وسلم
وكل ده اجابة عن السؤال ليه القدوة والمثل الاعلى للمسلم هوا سيدنا محمد
نزلت عليه الرسالة وربنا اختاره عشان يكون نبي هذه الامة
هوا جاء للناس بالخير الكبير ده بشئ ينقذهم من النار وكان في قلبه طاقة حب هائلة للناس مطلبش منهم مال ولا طلب جاه ولا كان له أي غرض من الدعوة دي الا انقاذهم
ورغم كده
كذبوه وشتموه واهانوه ومنهم اللي كان بييرمي عليه القذر وهوا بيصلى ومنهم اللي خنقه وهوا بيصلى ومنهم اللي بصق في وجهه وحبسوه تلات سنين من غير اكل ولا شرب لغاية ما اكل ورق الشجر هوا واللي معاه وطلقوا بناته الاتنين عشان يقعدوا له وضربوه وسال الدم منه وحدفوه بالحجاره ووقفوا صفين من الناس ومشوه بينهم وهما بيحدفوه بالطوب وحاولوا يقتلوه ونفوه من بلده وخرجوه منها
ورغم كل ده لسه بيحبهم ولسه بيحب ليهم الخير وبيدعي لهم ربنا ويقول اللهم اهد قومي فانهم لا يعلمون
لو واحد مننا حصل له موقف واحد من ده والله ما هيعرف الناس دي ويسيبهم يولعوا لانه مش طالب منهم أي شئ وهوا جاي لهم بالخير
تخيل لو موقف من دول حصل لواحد زي توماس اديسون وهوا بيخترع المصباح الكهربائي كان هيقول ايه ويعمل ايه
نابليون لما نفوه بعد هزيمته انتحر مستحملش الموقف
سبحان الله ما اعظمها من شخصية
هاجر واقام دولة وكان هوا رئيسها
اظن بعد ما بئا رئيس وملك ممكن يعمل كل شئ وممكن ينتقم من اللي ظلموه ويحاربهم بكل قسوة وعنده حق لكن ده لو لم يكن رسول الله
كانت الحرب عنده وسيلة مش غاية حتى مع اهل مكة اللي ظلموه واهانوه وعملوا فيه كل ده لما دخل مكة منتصر ومعاه جيش كبير اتوقعوا كلهم الابادة الجماعية والانتقام
عفا عنهم وقالهم اذهبوا فانتم الطلقاء
ما اعظمها من شخصية
جاءه المال وفاض عليه المال من كل اتجاه فلم تتغير نفسه
فيه مثل بيقول ( ان المال والسلطة لا تغيران النفوس بل تظهرها على حقيقتها )
متغيرش النبي صلى الله عليه وسلم في الحالين
نفس التواضع نفس حب الناس نفس الاهتمام بيهم
لم يتغير ابدا
مااعظمها من شخصية
اتجوز بعد خديجة كتير ولم ينساها ابدا بل ان اصغر زوجاته السيدة عائشة مكانتش بتغير من حد من زوجاته الموجودات على قيد الحياة بقدر ما كانت بتغير من السيدة خديجة
هل ممكن يكون فيه وفاء بهذا الشكل
ما اعظمها من شخصية
كان نعم الزوج في بيته وكان بيساعد زوجته في أي عمل كان بيرقع ثوبه ويخصف نعله وكان في مهنة اهله رغم ان كان عنده الزوجات وكان عنده الخدم ورغم كده كان لا يحب ان يثقل على احد فكان بيقوم بشانه بنفسه صلى الله عليه وسلم
وكان بيته عباره عن ملجا للايتام
كل زوجه تزوجها كانت اما ارملة او مطلقة ومعها اولادها ولم يتزوج بنت بكر الا عائشة رضى الله عنها فقط اما الباقي كلهم ارامل ومطلقات باولادهم وتكفل بتربيتهم والانفاق عليهم فكان ناجح في علاقته الزوجية
ناجح كأب لاربع بنات وثلاثة ذكور ناجح كزوج ام لعدد كبير من الابناء ناجح كجد وهوا بيتعامل مع الحسن والحسين ابناء فاطمة وأمامة بنت زينب ناجح وهوا حما أي والد زوجة لعلى بن ابي طالب وعثمان بن عفان وابو العاص بن الربيع
ما اعظمها من شخصية
عاش الالام الدنيوية كلها بلا استثناء
عاش اليتم صغيرا
عاش الفقر صغيرا وكبيرا لدرجة ان يمر الشهر والشهر والشهر ولا يوقد في بيت من بيوته نار للطبخ وكان طعامه كله التمر والماء
ربط حجرين على بطنه من الجوع صلى الله عليه وسلم
عاش السجن والحبس تلات سنين في شعب ابي طالب
عاش موت الاحبة
مات الاب قبل ان يراه
وماتت الام وهوا في السادسة
ومات الجد وهوا في الثامنة
ومات عمه ابو طالب الذي كان يدافع عنه من اذى قريش
وماتت زوجته الحبيبة خديجة رضي الله عنها
ومات ابناؤه الذكور كلهم وهم اطفال ولم يبق الا البنات وانتم عارفين تاثير ده على شخصية الانسان العربي لدرجة انهم كانوا بيعايروه ويقولوا عليه ابتر عشان معندوش ذكور يحملوا اسمه من بعده
وماتت بنته رقية ودفنها
وماتت بنته ام كلثوم ودفنها
وماتت بنته زينب ودفنها
ولم يبق في حياته من ابنائه السبعة الا فاطمة رضى الله عنها وماتت بعده بستة اشهر
حقا ما اعظمها من شخصية
وبعد الكلام السريع ده عن حياته صلى الله عليه وسلم اكيد كلنا اتاكدنا اننا لما نقرر ان الرسول عليه الصلاة والسلام هوا قدوتنا مش بنقولها لا تحيز ولا شئ انما احنا فعلا بنتكلم عن شخصية تكاملت فيها جوانب العظمة
شخصية عالية جدا كل واحد مننا يتطلع ليها ويحاول يقلدها
فالفلاح كل الفلاح في القرب من شخصيته
والخسارة كل الخسارة في البعد عنها
وان شاء الله نكمل في اللقاء القادم
والسلام عليكم ورحمة الله وبركاته

[/center]

مع تحياتي/الاميره الرقيقه...............maloka