موضوع: السيره النبويه الجزء الخامس الخميس فبراير 07, 2008 10:46 am
الحمد لله والصلاة والسلام على رسول الله اما بعد بعد متعرفنا على جوانب العظمة في شخصية سيدنا محمد ياللا بينا نبدا الحديث عن سيرة هذا النبي الكريم ونبدا الحكاية م البداية بعد مانصلى على سيدنا محمد صلى الله عليه وسلم الحكاية حكاية العرب لانه صلى الله عليه وسلم نبي عربي بعث من امة العرب ومن كل الانبياء اللي بعثوا ودول عددهم كتير جدا يزيد عن 125000 نبي ورد ذكر 25 منهم في القران منهم خمسة بس من العرب اللي هما هود وصالح واسماعيل وشعيب وسيدنا محمد عليهم الصلاة والسلام جميعا والعرب كانوا ثلاثة اقسام القسم الاول : قسم انتهى ومفضلش منه حد خالص كلهم ابيدوا عن اخرهم وعشان كده اسمهم العرب البائدة ودول زي قوم عاد وكان نبيهم سيدنا هود وزي قوم ثمود وكان نبيهم سيدنا صالح وربنا قال في كتابه (فَهَلْ تَرَى لَهُمْ مِنْ بَاقِيَةٍ) (الحاقة:
القسم التاني : اصل العرب الحاليين الموجودين للان وهما اسمهم العرب العاربة ودول ابناء راجل اسمه ( يعرب بن يشجب بن قحطان ) وده كان من اليمن واليمن زي ما نتوا عارفين كان فيها مملكة قوية اسمها مملكة سبأ اللي كانت منها الملكة بلقيس اللي اسلمت مع سيدنا سليمان و ربنا كان رازقهم بالامطار الكتيرة وكانوا بيجمعوها في مكان وعاملين عليه سد عظيم جدا اسمه ؟ مش السد العالي السد العالي عندنا في مصر اسمه سد مأرب وكانوا عايشين في خير كبير جدا وعندهم المزارع اللي بتطلع لهم كل انواع الخير لكنهم لم يشكروا الله على نعمه وبالشكر تزيد النعم وبالمعصية بتزول النعم وفعلا بدا السد في الانهيار وظهرت فيه الفئران اللي اكلت اخشابه وفعلا انهار سد مارب وله حكايات كتير جدا مش عاوز اوجع لكم دماغكم بيها المهم عند انهيار السد اضطر ابناء اليمن العرب الى الهجرة من اليمن واتفرقوا في كل انحاء الجزيرة العربية والعربي لما كان بيدور على مكان يستقر فيه كان كل همه انه يلاقي مكان فيه عين ماء يعيش فيه ولما عين الماء دي تجف كان يدور على مكان تاني فمكانش ليهم مكان ثابت ابدا وكل رحلاتهم كانت من اجل الماء عشان كده كانوا قبائل متفرقة ومكانتش فيه دولة بتجمعهم النظام عندهم قبلي مش نظام دولة منهم مجموعة راحت العراق وعاشت حوالين عيون الماء اللي في العراق وكان اسمهم العرب المناذرة وعملوا مملكة كبيرة هناك في مكان اسمه الحيرة وكان ملكهم اسمه المنذربن ماء السماء وعشان كده اسمهم المناذرة ومن اشهر ملوكهم ابنه الملك النعمان بن المنذر وكان اقرب الملوك لهم في العراق نفسها ملوك الفرس فعملوا معاهم معاهدات وكانوا حلفاء ليهم
ومجموعة تانية من اهل اليمن راحت الشام وعاشت حوالين بئر هناك وكان اسمهم العرب الغساسنة ودول كمان جاوروا ملوك الروم وعملوا معاهم معاهدات وكانوا حلفائهم تعرفوا شئ عجيب جدا كان دايما فيه حروب بين الفرس والروم فكان العرب المناذرة يشتركوا في الحرب ضد اخوانهم وولاد عمهم العرب الغساسنة بل احيانا ان الحرب بس بتكون ما بين المناذرة والغساسنة لصالح الفرس والروم حرب بين ولاد العم مالهمش مصلحة فيها هما الاتنين هم يضحك وهم يبكي المهم وقسم تالت راح مكان اسمه يثرب اكيد عارفينه طبعا يثرب ده الاسم القديم للمدينة المنورة التى نورت بوجود رسول الله صلى الله عليه وسلم فيها ودول كان اسمهم قبيلة الاوس وقبيلة الخزرج وكان فيه قبائل كتير استوطنت اجزاء كبيرة من الجزيرة العربية انتهينا كده من قسمين العرب البائدة والعرب العاربة ونكمل ان شاء الله في لقاء قادم والسلام عليكم ورحمة الله وبركاته
الرئيسية 
البوابة 
أحدث الصور 
التسجيل 
دخول 
الجمعة أغسطس 22, 2008 3:14 am من طرف wama4love
موضوع: السيره النبويه الجزء الخامس 
